眾說紛云

到底阿柏芝同阿霆鋒會唔會離婚，雖是城中熱話但仍係未知之數，不過係人都講到好似係自己啲親戚朋友離婚咁，連電台某節目於上星期都花咗啲時間喺空氣中同大家討論討論，仲非常多聽眾打電話去發表個人意見云云，分分鐘有討論價值過曾特首僭建。

記得威廉王子的世紀婚禮前後，老爸老媽都好知識豐富，對新人幾時識、幾時拍拖、幾時分過手、大學讀咩系、轉過咩科。。。大大小小嘅事都噏得出。我嗰時就笑話：「你哋個friend呀？定係鄰居呀？咁熟嘅？！」而家聽到電台啲聽眾講柏芝同霆鋒講到好似自己親戚朋友（首先，連姓都唔叫，friend到咁！），諗吓都真係覺得幾有趣。唔係話咩丫，隨時自己啲朋友離婚都無跟料跟得咁貼，亦都唔會analyse咁多，有咁多意見。

社會可能真係需要哩啲topic，減壓減壓。