鬼戲

頭先沖沖下涼，我又諗起老祖話我細個鍾意周星馳。

蝦，唔通我細個真係鍾意周星馳嘅？我明明係鍾意靚仔㗎，佢又唔靚仔，唔通我鍾意佢搞笑？無理由丫，又唔見我鍾意盧海鵬？！雖然我係近乎咩周星馳都睇過（連《望夫成龍》同《小偷阿星》在內，反而後期有幾套無睇），但係應該係咁啱㗎嗟，又唔係我自己搵嚟睇嘅。

點解我會隨口up拎阿盧海鵬出嚟比較呢。。。實情唔係隨口up，都係因為前排提起。勾起我對《點解阿sir係隻鬼》嘅回憶，當然記得「聖法蘭雅根信馬可勃羅德聖會亞洲至善堂司馬昭昭博士夫人第一紀念中學」。。。唔好意思，我個腦專裝垃圾。

八零年末九零年初，最興鬼戲。林正英道長當道，同期有《鬼新娘》同《倩女幽魂123》，亞視有《鬼做你老婆》、《隔離差館有隻鬼》同《點解阿sir係隻鬼12》等等電視劇，都咪話唔陰氣重。講開先講，《鬼新娘》係非常好戲，不過結局令人太傷心，到而家我仲記得最後一幕，就係定格起字幕嘅一幕（以前興係同電視劇一樣定格起字幕嘅），真係心傷。如果你無睇過，應該搵哩啲鬼戲嚟睇下，都不知幾經典。

蝦，原來我細個都睇幾多無謂野㗎喎。。。